5ª Xuntanza da Comisión Negociadora do IV Convenio e Acordo Xeral

 O 15 de decembro celebrouse a quinta xuntanza da Comisión negociadora do IV Convenio Colectivo e Acordo Xeral. Correos amosou o seu interese por acercar posturas para chegar a acordos insistindo en que non poden achegar propostas formais porque aínda non están autorizados pola SEPI. Con respecto ás propostas de Correos entregadas na anterior reunión, informou o representante de Correos dunhas  modificacións de mellora (en realidade e deixar eses puntos tal e como están agora no anterior Convenio). 

Estas son as modificacións que presentou Correos das propostas presentadas na 4ª reunión

• Flexibilizar as funcións dos postos de atención ao cliente, reparto e xefaturas de equipo en aras dunha maior polivalencia (isto ségueno mantendo, queren mozo para todo)

• Eliminación das compensacións económicas nas mobilidades funcionais e xeográficas. (isto  modifícano, agora propoñen negociar indemnizacións en determinados supostos ou transporte por parte da empresa e propoñerán que teñan preferencia nos concursos de traslados )

• Mellorar o sistema de selección do persoal de atención ao cliente (isto mantéñeno, elixir a dedo ao candidato)

• Reducir a tres as adxudicacións do Concurso Permanente de Traslados.( auméntanas a seis)

• Potenciar os contratos a tempo parcial e en prácticas.(retiran o de prácticas)

• Potenciar a xornada partida e garantir os servizos dos días 24 e 31 de decembro.( déixano como estaba no anterior Convenio)

• Axustar os permisos ao contemplado no ámbito da Función Pública e Estatuto dos Traballadores ( déixaos como están no anterior Convenio)

• Reducir os permisos por enfermidade familiar incluíndo como condicionante os famosos desprazamentos.( déixanos como están ata agora)

• Aplicar os descontos que teñen os funcionarios por enfermidade ao persoal laboral. (isto mantéñeno)

Valoración da CIG: 

1. Non nos cabe a menor dúbida que o Convenio xa o teñen máis que amañado, se non como se explica que uns destes sindicatos por erro xa publicara na súa web o contido da xuntanza antes de que empezara.
2. Non sabemos cales son esas melloras das que tanto falan CCOO,UGT,CSIF e SL, porque no mellor dos casos e deixar aos traballadores coas mesmas condicións que tiñan no anterior Convenio, sen mellora algunha, si acaso con perda de dereitos como no caso de aplicar os mesmos criterios de  descontos  por  enfermidade común do persoal funcionario ao laboral.
3. Manter dereitos do anterior Convenio non é ningún logro se o miramos ben, as melloras que nos queren vender estes sindicatos, non deixan de ser dereitos que ten o persoal funcionario, que  por converxencia de dereitos se aplican ao persoal laboral.
4. Onde están os puntos importantes polo que entendemos se debería estar negociando o Convenio, como por exemplo:

-          Os Incrementos salariais nas retribucións fixas ou de converter as retribucións variables en fixas. Disto non falan nada,  moi pola contra, calquera suba salarial  quérena en retribucións variables condicionadas a penalización por produtividade e absentismo, con criterios de aplicación sempre favorables á empresa, así se un traballador quere cobrar o seu mísero soldo terá que ir a traballar enfermo ou botar as tripas no seu posto.

-          Destrución de emprego. Tampouco lles interesa falar disto; nos derradeiros 5 anos destruíronse 14 mil postos de traballo en Correos sen que estes sindicatos digan nin pío. Sen embargo atrévense a falar agora de consolidación de emprego, cando nin sequera foron capaces  de loitar polos postos existentes. Así vemos como Correos continúa suprimindo prazas por tódalas oficina onde hai vacantes.

-          Concurso Permanente de Traslados. De pouco vale que sexan tres ou seis as resolucións, si Correos non saca todas as vacantes, todo grazas a que estes sindicatos asinan unhas condicións sempre favorables á empresa. Como exemplo valga o que di o derradeiro Convenio ao respecto “Só se cubriran por este procedemento aqueles postos que determine a empresa en exercicio das súas facultades directivas ….”

-          Xornada laboral de luns a venres para todos os Colectivos. Isto tampouco interesa a pesares da discriminación entre colectivos dunha mesma empresa.

-          Suba do carburante para o persoal Rural. O ultimo Convenio e Acordo Xeral asinado por CCOO, CSIF, UGT e SL,  foi unha burla para este colectivo. Os asinantes e Correos comprometíanse a analizar dentro dos tres meses seguintes á entrada en vigor de III Convenio, o custo que a evolución dos prezos do carburante tivo. Sen embargo nunca se sentaron a negocialo,  causando un prexuízo económico grave a este colectivo e un aforro de cartos  moi considerable a papa Correos .

-          Unha solución real para o colectivo de fixos-descontinuos e a tempo parcial. Posibilitar o acceso a postos de xornada completa, ofertándolle os postos vacantes antes de cada proceso de novo ingreso.

-          Cláusula de ultraactividade. Este punto é innegociable o IV Convenio Colectivo de Correos ten que ter cláusula de ultractividade sen condicionantes nin limitacións.

-          Regulación do permiso para ir ao médico. Non se pode permitir que un dereito nolo vendan como se fora un favor da empresa, que che permite ir ao médico porque son bos.

-          Recargos. Institucionalizáronse con estes sindicatos que non só os permitiron, se non que ademais xogaron a favor da empresa, indo polas oficinas intentando convencer e asustando a xente dicindo que as cousas estaban moi mal e que había que asumir as recargas de traballo, e  ademais tiñamos que dar grazas de ter un posto de traballo.   

¡¡Agora valora ti se isto é o que se debería estar negociando ou o que estes nos queren vender!!