NOTA SOBRE OS SERVIZOS MÍNIMOS PARA A FOLGA DO 11 DE NOVEMBRO EN CORREOS

 

 1-. Correos está obrigado a designar aos traballador@s que formarán parte dos servizos mínimos de cara á folga do día 11 de Novembro, notificando por escrito a cada traballad@r a súa designación como traballad@r que forma parte dos servizos mínimos.

 

A cantidade máxima de traballador@s que a empresa pode designar como servizos mínimos son:

a) Atención ao Cliente:

- En oficinas de ata 4 traballador@s: 1 empregad@ por quenda de traballo.

- En oficinas de entre 5 e 8 traballador@s: 2 empregad@s por quenda de traballo.

- En oficinas de mais de 8 traballador@s: 3 empregad@s por quenda de traballo.

b) CTA de Compostela: 

25% dos traballador@s de cada quenda de traballo.

 

c) USE: 

50% dos traballador@s de cada quenda de traballo máis un responsable.

 

d) Unidades de Distribución: 

50% dos traballador@s de cada quenda de traballo máis un responsable.

 

e) Servizos Rurais con Atención ao Público:

100% dos traballador@s.

 

2-. No caso de NON RECIBIR un documento coa designación, os traballador@s poderán decidir libremente se quere traballar o día 11 ou se prefire secundar a folga.

No caso de optar por acudir ao traballo, as funcións a desenvolver durante a xornada laboral serán as mesmas que calquera outro día de traballo.

 

3-. No caso de SI RECIBIR o documento coa designación, o traballad@r está obrigado a acudir ao seu posto de traballo o día 11, aínda que só estará obrigado a realizar as seguintes tarefas:

 

a) Atención ao Cliente:

· Admisión de solicitudes de voto por correo.

· Entrega de documentación electoral.

· Admisión do voto por correo.

 

b) CTA de Compostela:

· Tratamento de envíos electorais.

· Tratamento da propaganda electoral.

 

c) USE

· Entrega de documentación electoral na Oficina do Censo Electoral.

· Entrega da documentación electoral aos electores.

 

d) Unidades de Distribución:

· Entrega da documentación electoral aos elector@s.

 

e) Servizos Rurais con Atención ao Público:

· Admisión de solicitudes de voto por correo.

· Entrega de documentación electoral.

· Admisión do voto por correo.

 

Polo tanto, os traballador@s designad@s para formar parte dos servizos mínimos NON estarán obrigados a desenvolver as demais funcións (nin admisión nin entrega de calquera produto que non estea relacionado co proceso electoral), aínda que voluntariamente poderán facelo.

 

No caso de recibir algunha orde que sexa contraria a estas instrucións, non dubides en poñerte en contacto cos Delegados da CIG.

 

1. A DECISIÓN DE FACER FOLGA É TÚA.

Respectamos todas as decisións individuais, tanto de quen secunde a folga como de quen decida acudir a traballar.

 

2. NON TES QUE COMUNICAR SE VAS FACER FOLGA.

Non tes a obriga de anticiparlle á empresa a túa decisión nin de responder ás preguntas dos teus superiores sobre se vas secundar a folga.

 

3. NON ASINES DECLARACIÓNS SOBRE A TÚA INTENCIÓN DE TRABALLAR.

Non tes que asinar ningún documento no que manifestes que vas acudir ao teu posto de traballo.

 

4. SE ES DESIGNADA COMO SERVIZO MÍNIMO, ESIXE A COMUNICACIÓN POR ESCRITO.

A designación debe serche comunicada formalmente e de maneira individualizada. Solicita un documento no que conste expresamente que estás designada como servizo mínimo.

5. SE RECIBES ESA COMUNICACIÓN, ASINA SÓ O RECIBÍN.

A túa sinatura debe acreditar unicamente que recibiches o documento, non que estás conforme co seu contido.

Desde a CIG-CORREOS estamos denunciando as presións e vulneracións dos dereitos das persoas traballadoras.

O noso compromiso é defender os dereitos de todas e todos, respectando sempre a decisión individual de cada persoa.

 

A TÚA DECISIÓN É LIBRE. OS TEUS DEREITOS, IRRENUNCIABLES

A CIG impugnará os servizos mínimos impostos por Correos para a folga xeral do 11 de novembro por abusivos.

 

O sindicato denuncia que a empresa pretende impoñer uns servizos mínimos excesivos, que baleiran de contido o dereito fundamental á folga, e anuncia que recorrerá a súa aplicación.

A CIG considera abusivos e desproporcionados os servizos mínimos que Correos pretende establecer para a xornada de folga xeral do vindeiro 11 de novembro. O sindicato denuncia que a proposta da empresa non responde a criterios de verdadeira esencialidade e que pretende manter unha actividade moi superior á estritamente necesaria, limitando de maneira inxustificada o dereito das persoas traballadoras a secundar a folga.

A organización sindical critica que Correos volva recorrer a uns servizos mínimos que, lonxe de garantir unicamente as prestacións imprescindibles, pretenden asegurar o funcionamento habitual de boa parte da actividade postal. Unha decisión que evidencia a falta de respecto da empresa polo exercicio efectivo dun dereito fundamental recoñecido constitucionalmente.

Uns mínimos que non garanten servizos esenciais, senón actividade ordinaria

A CIG considera especialmente preocupante que Correos pretenda manter persoal en determinados servizos e unidades sen acreditar suficientemente por que resulta imprescindible a súa presenza durante unha xornada de folga xeral.

Non se pode confundir a prestación de servizos esenciais coa necesidade empresarial de manter a actividade ordinaria, cumprir obxectivos de produción ou evitar a acumulación de correspondencia e paquetería. A folga implica necesariamente unha interrupción da actividade e as consecuencias organizativas que dela se derivan non poden utilizarse como argumento para restrinxir un dereito fundamental.

A empresa tampouco pode aproveitar a prestación dos servizos mínimos para garantir a normalidade do reparto, a clasificación ou a atención ao público, nin para recuperar durante a folga a actividade que debería quedar paralizada polo seguimento do paro.

A CIG defenderá o dereito efectivo á folga

A CIG considera que a determinación dos servizos mínimos debe estar debidamente xustificada, responder a criterios de proporcionalidade e limitarse exclusivamente ás prestacións que resulten realmente indispensables.

A organización sindical lembra que os servizos mínimos non poden converterse nunha ferramenta para reducir artificialmente o impacto da folga nin para obrigar a traballar a unha parte desproporcionada do persoal.

Por todo isto, a CIG estudará a impugnación dos servizos mínimos establecidos por Correos e adoptará as medidas xurídicas necesarias para defender o dereito fundamental á folga das traballadoras e traballadores da empresa.

O 11 de novembro, o dereito á folga tamén se exerce en Correos. Ningunha imposición de servizos mínimos abusivos pode baleirar de contido este dereito fundamental.

ELECCIÓNS XERAIS DO 29N: GRATIFICACIÓNS, HORAS EXTRAORDINARIAS E CONDICIÓNS DE COBRO

Correos ten previsto un sistema de gratificacións económicas para o persoal que participe no proceso electoral das Eleccións Xerais do 29 de novembro de 2026.

A circular establece cantidades por determinados envíos electorais, unha gratificación extraordinaria segundo o posto de traballo e o pagamento das horas extraordinarias ou complementarias que correspondan.

1. GRATIFICACIÓNS POR ENVÍOS ELECTORAIS

• Gratificación extraordinaria xeral (Oficinas, CTA, USES, transportes...): 129,90 €.   
• Resto de persoal: 64,94 €.
• Propaganda electoral e tarxetas INE: a tarificación por obxecto clasificado e distribuído:

        0,070247 € con dirección
        0,028923 € sen dirección.  

• ⁠Documentación certificada electoral en domicilio: 

        0,639 € (entregada) 

        0,426 € (avisada).

No caso das oficinas satélite de tipo 1 e das oficinas auxiliares, a gratificación de 129,90 € calcularase proporcionalmente ao tempo de apertura da oficina respecto da xornada habitual.

As contías axustaranse á xornada laboral e ao horario de cada persoa traballadora. Serán aplicables ao persoal fixo e temporal nos supostos previstos.

É compatible coa gratificación por envíos?

Non, con carácter xeral. A gratificación extraordinaria é incompatible coas gratificacións individuais por envíos electorais.

A excepción corresponde ao persoal das oficinas satélite de tipo 1 e das oficinas auxiliares, que poderá percibir ambas as compensacións nos termos establecidos.

2. DESCONTOS POR DÍAS NON TRABALLADOS

Desconto de 11,81 € por cada día non traballado durante a campaña electoral, comprendida entre o 13 e o 27 de novembro.

Tanto os descontos como a base de cobramento serán proporcionais á xornada laboral e ao horario de cada traballador ou traballadora.

3. HORAS EXTRAORDINARIAS E REPARTOS ADICIONAIS

Se é necesario ampliar os horarios ou realizar repartos extraordinarios para atender o volume de traballo electoral, o persoal percibirá o pagamento das horas extraordinarias correspondentes. Para os contratos a tempo parcial aboaranse as horas complementarias que procedan.

O borrador establece que a organización destas horas debe realizarse con criterios de voluntariedade e obxectividade. Os repartos ou traballos complementarios deberán seguir o procedemento de xustificación e autorización previsto pola empresa.

4. TRABALLOS DO SÁBADO 28 E DO DOMINGO 29 DE NOVEMBRO

As instrucións distinguen dous días de traballo:

• Sábado 28 de novembro: os traballos realizados fóra da xornada ordinaria pagaranse como horas extraordinarias de sábado.

• Domingo 29 de novembro, día das eleccións: o traballo fóra da xornada ordinaria pagarase como horas extraordinarias de festivo. Para esta xornada establécese un módulo mínimo aboable de tres horas. No caso do persoal a tempo parcial, aboaranse as horas complementarias que correspondan.

Estas tarefas inclúen a entrega dos sobres co voto por correo nas mesas electorais, a recollida do terceiro sobre e o tránsito da documentación electoral.

Nos servizos rurais afectados que aumenten a súa quilometraxe habitual, aboarase o exceso, incluíndo a compensación polo consumo de combustible e pola amortización do vehículo.

6. VACACIÓNS E PAGAMENTO

Se prevé facilitar os cambios de vacacións e permisos que solicite o persoal cando coincidan co período electoral.

Tamén indica que Correos axilizará os trámites para que as cantidades correspondentes ao proceso electoral se paguen na nómina de decembro de 2026.

O servizo rural pagámolo co noso xornal.

 

A eliminación do diferencial de 0,04 € —consagrada no nocivo acordo asinado en outubro de 2023 entre Correos e os sindicatos CCOO, UXT, CSIF e Sindicato Libre— supuxo unha inaceptable renuncia a unha compensación fundamental para amortecer os custos de vehículo. Esta perda, unida á sistemática falta de cobertura de vacantes, agrava de forma crítica o impacto económico sobre as nóminas nos períodos de maior esixencia operacional

A CIG denuncia as declaracións vertidas polo PP e VOX poñendo en tela de xuizo a profesionalidade das traballadoras de Correos.

 

Por medio da presente dende a C.I.G. temos a ben denunciar as declaracións vertidas dende as cúpulas de diversas forzas políticas de dereita e ultradereita poñendo en tela de xuizo a profesionalidade e o cumprimento da Lei dun Servizo Público como é o prestado por Correos no Voto por Correo.

Vaia por diante que calquera persoa que teña votado por correo sabe do traballo e as esixencias que conleva a súa xestión. Deben pasarse tres filtros de seguridade. Hai un primeiro filtro de seguridade que é a Solicitude de Voto, que debe ser presentada polo propio elector identificándose co seu D.N.I. se o fai dende unha Oficina de Correos, ou con certificado dixital se se fai de xeito telemático dende a web. O segundo filtro de seguridade é a recepción da Documentación Electoral, que só pode ser entregada polo carteiro ó elector en persoa debidamente identificado, de novo, mediante o D.N.I. Este envío é un Certificado Oficial Urxente no que se inclúen todas as papeletas, o sobre de voto, o de voto por correo e a certificación censal. E o terceiro filtro de seguridade é que o elector debe depositar en persoa o sobre de voto nunha Oficina de Correos, identificándose por medio do D.N.I. de novo, por terceira vez. A remisión de todos os envíos de Documentación Electoral está supervisado polas Xuntas Electorais, formadas por xuices. Faise constar ademais que unha vez solicitado o voto por correo non poderá efectuarse o voto en persoa en furna o día dos comicios.

Facemos mención dende a C.I.G. que desapareceron 20.000 postos de traballo en Correos na derradeira década, dos que 5.400 desapareceron nos últimos dous anos. Non se cobren baixas, xubilacións, traslados, decesos, vacacións... Non se destruíu emprego estrutural, pero deixa de xenerarse o emprego eventual imprescindible pra vertebrar o territorio. A falta do persoal preciso é a carencia certa e o gran problema de Correos estes anos, saneando contas a base de recortar postos de traballo.

Pero no canto disto o que resulta esperpéntico son as declaracións tanto do Partido Popular como de Vox ó solicitar que non se vote por correo. A dereita e a ultradereita mais neoliberal, no mais puro estilo “el que pueda hacer que haga”. Estas gravísimas e totalmente inaceptables declaracións non só poñen en tela de xuizo a profesionalidade e o cumprimento da Lei por parte de Correos, senon que asimesmo socavan a credibilidade da Administración e da propia democracia en España. Os votos que se admiten a través das 2.388 Oficinas de Correos son custodiados provincialmente, arquivados e controlados por medio de relacións detalladas en despachos precintados ata o dia dos comicios. Ese día, eses millóns de votos (2.5 millóns no 2.023) son levados polos 30.000 carteiros a todas as Mesas Electorais. Controlados, rexistrados, selados, sen sinais de ter sido abertos e voltos a pechar. A posibilidade de manipular ese tan elevado número de votos xestionado en tal cantidade de unidades non só é mentira. É absolutamente imposible.

Ante este ataque debera ser a propia Administración quen saíse, por ética á palestra para defender o bon facer dos seus empregados e do seu servizo. Tanto por parte da Presidencia de Correos como do propio Ministerio, ou da propia S.E.P.I. Isto é algo do que non se pode xenerar nin controversia nin dúbida ningunha nin hoxe, nin nunca. Goberne, ou malgoberne millor dito a cor política que o faga. E todas e todos os demócratas debemos tamén estar á altura, esixindo e defendendo a credibilidade, o rigor e a legalidade das Administracións e non permitindo que as socaven e atenten contra a democracia misma. Non vale todo. Ningún ataque como este ten cabida algunha, veña dende a esquina neoliberal que veña. 

Calendario laboral 2027. Negociación xa!

 

A CIG esixe que se convoque xa o concurso de traslados

 

Apertura do Portal de Emprego sen emprego: Saura e os seus cómplices sindicais (CCOO, UGT e CSIF), asinantes do Acordo Marco, continúan coa política de contratación 'cero' para axustar as contas en Correos

Correos abre un novo período de inscrición a partir do 1 de outubro até o 1 de novembro 2026, dirixido ás persoas interesadas en traballar na empresa. 

Este Portal ten carácter temporal e non substitúe as Bolsas de Emprego, senón que serve como unha solución provisional mentres se establece un novo sistema de contratación de persoal eventual operativo.

O persoal eventual, xa inscrito nas Bolsas de emprego, NON ten que inscribirse no portal de emprego.

Requisitos para a inscrición:

• Ter 18 anos ou máis. 
• Contar co título de Graduado Escolar ou equivalente.
• Posuír nacionalidade española ou permiso de traballo en vigor.
• A inscrición no Portal de Emprego non garante a inclusión en futuras Bolsas de Emprego nin supón un compromiso de contratación.

O Portal abrirase cada catro meses, polo que será necesario inscribirse en cada proceso, indicando as preferencias e a dispoñibilidade para a contratación.

Como funciona o Portal de Emprego (orde de chamamento):

• Persoas das Bolsas
• Persoas con experiencia previa en Correos
• Persoas inscritas no Portal

As inscricións poden realizarse a través do seguinte enlace:

https://empleo.correos.com/

✅A CIG sempre se manifestou en contra deste sistema de contratación, no que se realizan chamamentos que ninguén entende, baseados en rotacións incomprensibles e incontrolables que xeran desconfianza xeralizada. 

❎A CIG defende un modelo de contratación como o existente no resto da Administración, con chamamentos por rigorosa orde, claros, transparentes e publicados na páxina web de Correos.

A CIG denuncia que Correos mantén ás traballadoras de Coristanco soportando temperaturas de ata 29,6ºC sen climatización nin medidas preventivas

 

Correos limita as súas indicacións a recomendar que o persoal saia á rúa durante dez minutos cando a temperatura supera os 27 ºC

A sección sindical da CIG-Correos denuncia a grave situación que continúa vivindo o persoal da Unidade de Reparto de Coristanco, onde as altas temperaturas rexistradas no interior do centro de traballo seguen poñendo en risco a saúde das persoas traballadoras sen que Correos adopte medidas preventivas eficaces.

Tras os escritos presentados pola CIG hai máis dunha semana, no que se solicitaba a contratación de persoal e a adopción urxente de medidas para combater a calor no actual local, a empresa limitouse a cubrir unha baixa médica, sen dar resposta ao resto das peticións formuladas polo sindicato.

As medicións realizadas no propio centro de traballo durante os diferente días desta semana, rexistraron temperaturas de 27,2 ºC ás 08:55 horas e 29,6 ºC ás 14:41 horas, superando o límite de 27 ºC establecido para oficinas no Real Decreto 486/1997 sobre disposicións mínimas de seguridade e saúde nos lugares de traballo.

Segundo trasladan as propias traballadoras, Correos comunicou que non dispón de ventiladores en Galicia e que deben solicitarse aos servizos centrais en Madrid. Mentres tanto, a única indicación facilitada pola empresa consiste en recomendar que, cando a temperatura supera os 27 ºC, o persoal abandone o posto de traballo durante dez minutos para saír á rúa e respirar.

Para a CIG, esta resposta evidencia a absoluta falta de planificación preventiva dunha empresa que coñece perfectamente a situación, foi advertida formalmente pola representación sindical e, malia iso, continúa sen adoptar medidas eficaces para protexer a saúde das persoas traballadoras.

A organización sindical lembra que o centro de Coristanco continúa situado nun local baixo cuberta, sen aire acondicionado nin sistemas de refrixeración adecuados, circunstancia que agrava os efectos das vagas de calor e converte a prestación do servizo nunha actividade especialmente penosa durante os meses de verán.

Ademais, a CIG denuncia que segue sen recibir contestación oficial de Correos sobre as medidas preventivas adoptadas nin sobre a previsión de traslado ao novo local, a pesar dos requirimentos remitidos á empresa nos últimos días.

A sección sindical considera inaceptable que unha empresa pública pretenda afrontar un risco laboral evidente con recomendacións improvisadas en lugar de aplicar medidas preventivas reais, como esixe a lexislación en materia de prevención de riscos laborais.

Por todo isto, a CIG esixe a implantación inmediata de sistemas de ventilación ou refrixeración adecuados mentres non se produza o traslado ás novas instalacións e advirte que, de persistir esta situación, presentará nos vindeiros días a correspondente denuncia ante a Inspección de Traballo e Seguridade Social, achegando toda a documentación e as probas recollidas, para que se investiguen os posibles incumprimentos da normativa preventiva por parte de Correos.

Prensa:

La Voz de Galicia

Diario de Bergantiños

Avantar

Galicia XA

Tercera información

Cursos de Galego 2026 subvencionados por Correos

Correos mantén a convocatoria de axudas para a realización de cursos de galego durante o ano 2026, dirixida ao persoal en activo.

Se estás pensando en mellorar o teu nivel de galego, estes son os aspectos máis importantes que debes coñecer.

✅ Quen pode solicitalo?

Poden acceder a esta axuda os traballadores e traballadoras en activo de Correos.

Importante: é imprescindible permanecer en activo durante todo o período de realización do curso. Se non se cumpre este requisito, a solicitude non poderá tramitarse.

📝 Documentación que hai que presentar

Toda a documentación deberá entregarse á Área de Desenvolvemento e Formación.

Antes de comezar o curso:

📄 Solicitude debidamente cumprimentada.

🎓 Certificado de matriculación expedido polo centro de formación.

Unha vez rematado o curso:

Será necesario presentar:

✔️ Certificado de asistencia e superación.

🧾 Factura orixinal do centro de estudos e/ou xustificante do pagamento.

📌 Requisitos da factura

A factura deberá incluír:

Nome do centro de formación.

NIF do centro.

Nome e DNI do alumno ou alumna.

Importe do curso e da matrícula (indicando que está exento de IVE).

Número de factura.

Selo e sinatura do centro.

📚 Material subvencionable

Ademais do importe do curso, tamén poderá aboarse:

📖 Un libro de texto por curso (presentando a correspondente factura).

📘Un dicionario (unha única vez na vida laboral, se se solicita nesta convocatoria).

❌ Non se subvencionarán libros de lectura recomendada.

💻 Modalidades admitidas

Os cursos poderán realizarse en:

- Formación online impartida por un organismo oficialmente acreditado.

- Formación presencial.

- Formación semipresencial.

Todos os cursos deberán realizarse fóra da xornada laboral.

⚠️Condicións importantes:

• É obrigatoria unha asistencia mínima do 80 % das horas lectivas.
• Correos poderá realizar unha proba de nivel para comprobar o aproveitamento da formación.
• As solicitudes admitiranse en función da dispoñibilidade orzamentaria e das necesidades do posto de traballo.

💶 Contía da axuda 

✔️ Concederase unha única axuda económica, unha vez finalizada a formación.

✔️ Toda a documentación e as facturas deberán presentarse nun único envío.

💰 O importe máximo que aboará Correos será de 690 € por alumno/a, con independencia de que realice un ou varios cursos.

📄 Certificado de nivel

As persoas que dispoñan dun certificado oficial acreditativo do nivel de galego poderán presentalo conforme á normativa vixente da súa Comunidade Autónoma.

ℹ️ Máis información

Para resolver calquera dúbida podes contactar coa:

Coordinación de Formación – Área Noroeste

📞 638 54 64 34   ☎️ RICO: (4) 82032

Desde a CIG-Correos recomendamos presentar toda a documentación correctamente e conservar copia de todos os documentos entregados para evitar incidencias na tramitación da axuda.