Nos últimos anos a xestión e a política laboral da Sociedade Estatal de Correos e Telégrafos consistiu nunha progresiva redución de persoal nas oficinas de correos, especialmente no medio rural. En Galiza, as oficinas postais de repartición e de distribución víronse afectadas polas constantes diminucións dos persoais, con baixas sen cubrir ou prazas que non se substitúen, ademais da falta de medios.
Unha situación xeneralizada que afectou ás oficinas urbanas pero que é especialmente grave nas oficinas de localidades do medio rural. Unha das unidades de repartición que leva tempo arrastrando problemas de deficiencias na dotación de persoal é a situada en Lalín (Pontevedra), problemas que se viron agravados pola fala de cobertura de vacantes e de baixas que non permiten garantir á cidadanía o dereito ao servizo postal universal.
Esta situación obrigou ao persoal para realizar múltiples protestas e concentracións para denunciar a falta de 6 traballadoras e traballadores nun persoal de 23. Co persoal existente tivéronse que organizar as reparticións nas zonas rurais e na localidade, así como a distribución das quendas horarias. Ademais, desde o día 18 de febreiro finalizaron os contratos de reforzo da campaña electoral das eleccións galegas.
As protestas do persoal levaron a Correos a moverse tibiamente, contratando unha persoa para a quenda da mañá e outra para a quenda da tarde, unha dotación claramente insuficiente e que non permite atender óptimamente o servizo nin dar saída á carga de traballo. Debe terse en conta que o concello de Lalín conta con numerosos núcleos rurais e unha alta dispersión poboacional que obrigan a importantes desprazamentos.
A lei 43/2010, do 30 de decembro, do servizo postal universal, dos dereitos dos usuarios e do mercado postal establece que todos os usuarios remitentes ou destinatarios de envíos postais teñen dereito a un servizo postal universal de calidade e a prezos asequibles. A normativa estipula o dereito a un servizo postal universal de calidade e a protección dos dereitos dos usuarios e traballadores do sector.
Desde logo sen a dotación de persoal suficiente, sen que se cubran as vacantes e as baixas, non se pode garantir a prestación dun servizo de calidade, e tampouco se están protexendo os dereitos dos traballadores e das traballadoras.
Polos motivos expostos, o BNG formula as seguintes preguntas ao Gobierno:
1. Vai a Sociedade Estatal de Correos e Telégrafos a cubrir as deficiencias de persoal na Oficina de Correos de Lalín (Pontevedra)?
2. Por que razón non se cubriron as vacantes e as baixas que deixaron o persoal mermado con seis persoas menos? É consciente da sobrecarga de traballo que ten o persoal da devandita oficina nun concello cunha alta dispersión poboacional que obriga a realizar roteiros con grandes desprazamentos?
3. Vai dotar de máis persoal a esta Oficina para que se poida garantir o servizo postal universal e de calidade que estipula a lei? Non cre que non se están protexendo os dereitos dos traballadores e das traballadoras en liña co establecido na lei postal?
4. Cales son as previsións da Sociedade Estatal de Correos en relación ao aumento de persoal nas Oficinas postais en Galiza? Que disposición ten a reforzar os medios e os persoais das Oficinas situadas no medio rural?