A CIG de Lugo compareceu o pasado venres en rolda de prensa para
informar da sentenza pola que o xulgado do social 2 de Lugo condena a
Correos a incluír a un traballador nas listas de contratación, ao que
excluíra por ser xordo, así como a abonarlle os salarios deixados de
percibir. Dende a CIG de Lugo amosaron a súa satisfacción pola
resolución xudicial, xa que se trata dun claro caso de discriminación.
“Parécenos un escándalo que un traballador sexa discriminado
dunha empresa pública como Correos e non se lle contrate como lle
correspondería pola súa posición nas listas polo feito de ser xordo”,
denunciaba o Secretario Comarcal da CIG Lugo-A Mariña, Antonio Niño,
durante a comparecencia para os medios, na que tamén estiveron presentes
o propio traballador afectado, Miguel Fernández, e o delegado da CIG en
Correos, John Vivancos.
Niño criticou a dobre discriminación á
que se veu sometida o traballador por parte de Correos: por unha banda,
ser excluído das listas de contratación por ser xordo, e doutra o propio
feito de quedar sen o dereito a un traballo. Por iso mesmo, dende a CIG
de Lugo pídese á empresa postal que renuncie a recorrer a sentenza e
acate a resolución, posto que “sería un escándalo” que unha empresa,
ademais do sector público, apelase a decisión xudicial, cando “existe un
móbil claramente discriminatorio”.
O traballador afectado estaba
inscrito na bolsa de emprego de Correos e foi chamado (en xullo do ano
pasado) para cubrir un posto como carteiro rural en Vilalba durante dous
meses. Para a súa sorpresa, foi sometido a un exame médico de empresa
no que se lle considerou non apto para realizar as labores de reparto e
inmediatamente foi excluído das listas.
Paradoxalmente, o
afectado xa ten realizado, sen ningún tipo de problema, traballos para
outras administracións públicas -nunha oficina de emprego e en varias
administracións xudiciais- nos que tiña que realizar atención ao
público. De feito os ditames do Equipo de Valoración e Orientación
recoñécenlle unha discapacidade do 37%, mais que se considera compatíbel
coas funcións do corpo de tramitación e de auxiliar de administración
de xustiza.
E a este respecto, na sentenza enténdese que está
demostrado que, a pesar da súa xordeira, o traballador pode comunicarse
perfectamente e atender aos usuarios/as sen dificultades, mais censura
que dende Correos non se lle tivese realizado ningunha proba para
valorar a súa capacidade de comunicación ou atención ao público. Isto
tería permitido comprobar que, efectivamente, Miguel Fernández está
totalmente capacitado para desenvolver o traballo de carteiro rural.
Por
iso, a sentenza declara que non hai lugar para a exclusión do
traballador das bolsas de reparto de Vilalba, condenando a Correos a
abonar, en concepto de indemnización, os salarios deixados de percibir.