O Gabinete Técnico de Economía da CIG vén
de facer público un documento no que se analizan os principais contidos
da nova reforma laboral promovida polo PP e que endurece
notablemente todas as medidas esenciais das normativas anteriores co
único obxectivo de protexer os empresarios. O seu núcleo duro
afecta á contratación, á flexibilidade interna, á negociación
colectiva e ao despedimento.
O
texto comeza lembrando que dende a crise económica dos anos 80 iniciouse un proceso continuado de desmantelamento do dereito do
traballo a prol da parte máis forte nas relacións laborais, o
capital. Até o de agora, as tres grandes reformas foron reformas
para a crise, que non solucionaron nin incidiron no gravísimo
problema do desemprego, pero que determinaron o modelo de relacións
laborais en todo o territorio do Estado español.
A
de 1984 centrada na flexibilidade de acceso ao traballo determinou a
precariedade laboral típica do noso mercado laboral; a de 1994
centrouse na flexibilidade interna empeorando as condicións de
traballo e configurando unha negociación colectiva a peor; a reforma
de 2010 facilitou a saída, axilizando e abaratando o despedimento.
Pechábase así un círculo infernal contra os traballadores e
traballadoras.
Ante
ese desmantelamento dos dereitos laborais, o único que lles restaba
era combater directamente o contrapoder sindical, impor a
individualización das relacións laborais e dificultar a
autoorganización da clase traballadora. Tal cometido abordouse coa
reforma da negociación colectiva no 2011 combinada cunha sistemática
campaña de desprestixio do sindicalismo.
Todas
estas reformas foron impostas polos Gobernos do PSOE. Agora, o actual
Goberno do PP tira de látego para aprobar outra reforma que endurece
notablemente todas as medidas esenciais das reformas anteriores co
único obxectivo de protexer aos empresarios . O seu núcleo duro
afecta á contratación, á flexibilidade interna, á negociación
colectiva e ao despedimento.
Temos
que seguir insistindo, diante da cidadanía, na necesidade de loitar
por un cambio de sistema económico que nos permita construír un
modelo de organización social e económico moito máis xusto,
solidario, democrático, sostíbel desde o punto de vista social e
ambiental, que estea realmente ao servizo dos intereses da clase
traballadora e que garanta, no noso caso, o dereito a decidir como
nación o noso futuro, é dicir, o dereito a exercer a nosa soberanía
política.
Analise da reforma laboral, prema aquí
Folleto explicativo sobre a reforma laboral, prema aquí